• Accogliu
  • Cundizioni generale di vendita

Cundizioni generale di vendita


A cumpagnìa marìttima Corsica Ferries France Sas

E transazzioni di compra realizate da u situ www.corsicaferries.com , è u cuntrattu di trasportu sò fatti cù Corsica Ferries France Sas, sucetà cù u capitale di 4 627 125 €.
Sede suciale : Le Palais de la Mer
Avenue Pascal Lota - BP 275
20296 BASTIA CEDEX - France
Siret : 496 320 151 000 46
Codice APE : 5010 Z
TVA intracumunitaria : FR 86496320151
Telèfunu : (0033) 04.95.32.95.95

Règule generale

1) Impurtante : L'acquistu d'un bigliettu intende da a parte di u passageru l'accunsentu senza cundizioni di tutte e règule generale di trasportu cullucate quì sottu.
2) Definizione : S'intende cù u tèrmine "passageru" ogni persona da traspurtà mintuvata nantu u bigliettu. S'intende cù u tèrmine "traspurtadore" à CORSICA FERRIES. Tutti l'impiegati è agenti di u traspurtadore puderanu gode di i diritti guarantiti da u traspurtadore cù e prisenti cundizioni generale.
3) Lege da appiecà : Fora chè altrimente accennata, u cuntrattu di trasportu di passageri, bagagli, è/o veiculi serà disciplinatu da a Lege di a Bandera di a Nave.
4) Unità : U veìculu, cumpresa simmai rimorca o caravana cù u so cuntenutu, custituisce una unità ùnica di càricu imbarcata senza dichjarazione di valore.
5) Tariffu : U traspurtadore si tene u dirittu di move senza preavisu e tariffe è u costu di tutti i servizi furniti.
6) Danni à e persone è veiculi : Hè cuperta a rispunsabilità di u traspurtadore per i danni à e persone è veìculi traspurtati da a lege di a Bandera di a Nave è da e cunvenzioni internaziunale da appiecà.

Riservazione - Compra

7) Cummanda - Riservazione : A riservazione da u situ web si face in pochi clicchi è in piena sicurezza.
L'infurmazioni rilative à i tariffi è a dispunibulità sò tenute sempre à ghjornu ogni stonda da Corsica Ferries.
I tariffi mintuvati dop'à dumanda di prezzu sò guarantiti per tuttu u tempu di a sessione di cunnessione di l'utilizadore à u situ www.corsicaferries.com .
A riservazione diventa effettiva dopu cliccatu nant'à "Cunfirmà", da ch'ella hè accettata a carta di crèditu.
Un tempu di ritiru pò esse adupratu u ghjornu stessu di a riservazione, fin'à mezanotte. Serà addebitatu ogni pagamentu fattu cun Paypal, puru s'ellu n'hè statu fattu l'annullamentu in ghjurnata, ma serà rimbursatu dopu qualchì tempu.
I scambii di data o di prestazioni fatti u ghjornu stessu di a riservazione seranu fatti senza spese, è cù u tariffu di e nuvelle date è/o prestazioni scelte.
Un nùmeru di riservazione (còdice à 7 sciffri) cù un riassuntu di a riservazione veneranu stampati à u screnu.
Per mail è senza spese d'invìu serà mandatu in autumàticu u tìtulu di trasportu, à l'indirizzu email da voi mintuvatu tempu a riservazione.

8) Pagamentu - Transazzione di banca : Sò accettati i pagamenti quì sottu :
- carta de crèditu (CB, Visa, Eurocard, Mastercard, E-carta)
- AMEX
- Carta COFINOGA (Un creditu ghjè impegnu è deve esse rimbursatu. Per piacè verificate a vostra capacità di rimborsu prima chè d'ingagiavvi).
- U pagamentu in 3 volte : Hè pussìbule cun carta bancaria Visa, Mastercard o American Express. U prezzu di u bigliettu deve esse da 200 € TTC in là, è a data di partenza à l'andà deve esse uguale o aldilà di 70 ghjorni pè raportu à a data di compra.
Vènenu cusì almanaccate e scadenze di prilevu di a carta bancaria :
1a scadenza, u ghjornu di a compra.
2a scadenza, 30 ghjorni dopu a data di a compra.
3a scadenza, 60 ghjorni dopu a data di a compra.
Spese di pagamentu attempatu, di valore 6 €, vènenu aghjunti à u prezzu di u bigliettu cusì pagatu in 3 volte.

U pagamentu si face in piena sicurezza per via d'un sistemu d'inturbidimentu chjamatu SSL (Secure Socket Layer).
Ogni transazzione hè fatta in €, ancu pè a Sguìzzera.
I partenarii finanzarii di Corsica Ferries sò : A Banque Populaire Provençale et Corse, cù a suluzione VAD "CyberPlus Paiement TM" de Natexis (aduprendu a tecnulugia SIPS d'ATOS).


Cundizioni di tariffu

9) Règule di tariffi ferries : I prezzi cumunicati mòvenu trà un valore mìnimu è màsimu, à prestazione è à traversata, fora di tasse è diritti purtuali è territuriali.
U scontu per i zitelli hè appiecatu nant'à u prezzu di a traversata, è micca nant'à quellu di e cabine è di u soprapiù Express.
Ùn sò cumulèvule i nostri tariffi speciali.
U prezzu pè i passageri pò esse sferente secondu ch'ellu viaghja cù un veìculu à mutore (vittura, mottò, camping car, ...) o senza.
Per una riservazione fatta per telèfunu à u nostru centrale di riservazione, vi seranu fatturati 10 € per spese di gestione. Per una riservazione fatta cù u web, vi seranu fatturati 6 € per spese di transazzione. Ste spese ùn seranu mai rimbursate.
Corsica Ferries si tene u dirittu di stabilì, dop'à l'acquistu di u biglietti, casuali supplementi di tariffu liati à a crèscita di u prezzu di u carburante o puru à ingrevimentu fiscale riguardu l'appiecu di norme di sicurità o d'ISPS Code.

Transazzioni di banca : Tutte e transazzioni online sò fatte in modu sicurizatu (SSL) è in €, ancu per a Sguìzzera.

Biglietti cun tariffu à prumuzione : Un bigliettu emessu cun qualsìasi prestazione cun tariffu prumuziunale ùn si pò mudificà, nè rimbursà in casu d'annullamentu.

Biglietti cun tariffu Standard : Un bigliettu emessu cun tariffu standard si pò mudificà, paghendu 30 € per traversata, da aghjustà à e casuale diferenze di tariffu, ma ùn si pò rimbursà, nè in parte nè in tuttu.

Biglietti cun tariffu Flex : Un bigliettu emessu cun tariffu Flex si pò mudificà, aghjustendu e casuale diferenza di tariffu. U tariffu Flex si pò sceglie solu tempu a riservazione. In casu d'annullamentu in parte o in tuttu, u bigliettu cù tariffu Flex hè sugettu à penalità (cf. Annullamenti).

Offerta cun prumuzione Top Deal : Hè riservata st'offerta à chì hà un contu Corsica Club. Vene appiecata nant'à i viaghji à pass'è vene in partenza da u cuntinente versu a Corsica, basta ch'elle sìanu dispunìbule e classe di tariffu è di prestazioni.
Omu pò riservà e prestazioni passageri, veìculu è a data di viaghju pruposti nentr'à l'offerta Top Deal. A traversata, l'ora, i porti di partenza è di scalu è u battellu seranu sappiuti da u cliente 7 ghjorni prima di u ghkjornu di a partenza.
- Pò esse riservata l'offerta fin'à 30 ghjorni prima di a partenza.
- U sugiornu in Corsica hè limitatu da 2 à 21 ghjorni à u màsimu.
- A prumuzione vene appiecata solu nant'à e prestazioni passageri è veìculu.
- L'offerta vale solu per un veìculu di turìsimu : e misure ùn ponu assupranà 5m di longu (portabicicletta impussìbile), 1,90m d'altu (cascione di tettu impussìbule), è 2m di largu.
- Hè ubligatoriu ch'ella sia cunfirmata l'offerta à pàrtesi di 7 ghjorni prima di a data di partenza, andendu nant'à u situ, è solu per i viaghji pruposti nant'à u situ.
- U tìtulu di trasportu definitivu vene mandatu à pàrtesi di 7 ghjorni prima di a data di partenza.
- E prestazioni altre (cabine, manghjusca ...) ponu esse riservate (for'di l'assicurenza Mondial Assistance) temp'à a cunfirmazione di l'offerta, vale à dì 7 ghjorni prima di a partenza, à u tariffu in corsu di validità è dispunibulità.
- Offerta cun prumuzione. Ùn pò esse nè mudificata nè rimbursata.

Annullamenti : Un bigliettu emessu cun tariffu Flex o Residente puderà esse mudificatu, è in casu d'annullamentu in parte o in tuttu, serà sugettu à e penalità quì sottu, da appiecà à u prezzu fora di tasse :
- 10% di u prezzu di u bigliettu fin'à un mese prima di a partenza,
- 20% fin'à 48 ore prima di a partenza,
- 50% fin'à l'ora-lìmita di prisentazione à l'imbarcu,
- 100% aldilà di u tempu lìmitu di prisentazione à l'imbarcu (1 ora prima di a partenza) o dop'à l'arregistramentu, è quelli biglietti diventeranu invàlidi.
Per l'annullamentu di un bigliettu per cui era digià statu fattu un scambiu di data, si tenerà contu di u ghjornu di a partenza iniziale.
In casu d'annullamentu in tuttu di un bigliettu pagatu cù carta di crèditu, è rimborsu di e tasse (purtuale, regiunale è di sicurezza), seranu ritenute spese di gestione d'annullamentu di 1,50 €.
I biglietti pagati cun carta, nant'à u situ internet o per telèfunu, vènenu rimbursati da accredimentu nant'à a carta di a compra. I biglietti pagati cun sceccu, frasca o puru in agenza o guichet vènenu rimbursati da viramentu bancariu (porghje qualchì RIB o RIP).

Vèndita in privatu : ùn serà mantenutu nisuna prestazione o vantagiu di tariffu acquistatu durante una vèndita in privatu nant'à u situ internet in casu di scambiu d'ora, data, ligna, nè mancu serà rimbursatu quellu in casu d'annullamentu di u bigliettu.

Mudìfica : Ùn serà cuncessu nisun'rimborsu in casu di scambiu di data, ligna o categurìa di veìculu.
In tariffu Standard hè sugettu à una penalità di 30 € qualsìasi mudificazione (cumpresu immatriculazione di a vittura), da aghjustà à e casuale diferenze di tariffu. Ùn hè pussìbule di scambià casata o nome di qualsìasi passageru.
Un bigliettu emessu cun tariffu Flex pò esse mudificatu in listessa categurìa di tariffu (Flex) è veneranu incasciate e casuale diferenze di tariffu.
In pagamentu in 3 volte, o 3 volte sanza spese, hè pussìbule di scmabià a data di u bigliettu. Tandu sò mantenute e date di scadenza fintantu chì a nuvella data di u bigliettu à passà ferma uguale o sott'à 70 ghjorni. S'ella hè sott'à 70 ghjorni a nuvella data, a scadenza o e scadenze chì fermanu seranu prelevate sùbitu.
Ùn serà cuncessu nisun'rimborsu s'ella hè più bassu u tariffu di u viaghju novu di pettu à quellu prima.
I biglietti ponu esse mudificati nant'à u situ internet, o chjamendu u nostru centrale, à u 04 95 32 95 95.
In casu di pèrdita o arrubbecciu di u bigliettu, hè necessariu d'acquistanne unu novu. Serà rimbursatu u bigliettu persu è unancu utilizatu 1 annu à pàrtesi da a so data d'emissione.

Riservà un veìculu : Tempu a riservazione, hè ubligatoriu di mintuvà e misure ghjuste, a marca è u tippu di veìculu. Pè calculà u tariffu sò cunsiderate e misure di u veìculu solu, fora d'altru restu.
Veìculi fora di misure nurmale : Ogni veìculu di più di 5m di longu è/o di più di 1,90m d'altu è/o di più di 2m di largu, essendu sugettu à soprapiù deve esse dichjaratu à tempu a riservazione. In casu di falza dichjarazione di misure di u veìculu, a Cumpagnìa si tene u dirittu di ricusalli l'accessu à bordu o d'incascià ciò chì li si deve à u tariffu di u ghjornu di a partenza, ancu nant'à u viaghju à l'andà, puru digià passatu quessu.

Titulu di trasportu - Bigliettu

10) Validità : Vale solu u bigliettu di passaghju per e persone è i veìculi mintuvàtici nantu, per a nave per cui hè statu emessu è per l'accumudazioni è a partenza mintuvàteci nantu. Un bigliettu ùn pò micca esse cedutu. Fora chè altrimente indetta, hè stabilitu u prezzu di u bigliettu per e persone è l'accumudazioni, senza cibu, ma includendu TVA, s'ella hè devuta quessa. In casu di scambiu di classa da superiore à inferiore, ùn hè fattu alcun'rimborsu.

11) Prisentazione : U passageru ùn hè micca tenutu d'avè un bigliettu nantu carta. U bigliettu pò esse mandatu à u passageru per posta (basta ch'ella sia fatta a dumanda in tempu è ora), per mail, fax o puru sms. Perciò u passageru pò ghjustificà di u so tìtulu di trasportu s'ellu prisenta :
- u so bigliettu ricevutu per posta
- u so Tick@mail
- u so Tickefax
- una copia di screnu di a riservazione
- o puru dendu u nùmeru di u so bigliettu cù un ducumentu d'identità in corsu di validità.

Règule d'imbarcu

12) Prisentazione : U passageru cun veìculu si deve prisentà direttamente à u pede di u battellu 1 ora prima di a partenza (1 mezora senza veìculu). Francata l'ora-lìmita di presentazione annunciata, ùn hè più guarantita a riservazione nè l'imbarcu. Difatti, puderà accade chì l'ora di partenza sia mossa senza preavisu fin'à 30 minuti in avanzu di pett'à l'ora publicata.
13) Cuntrolli : À ogni mumentu ponu occorre cuntrolli di bigliettu, d'identità, ch'ella sia in portu o à bordu. Tenite puru cun voi ghjustifiativi di riduzzione, ducumenti d'identità in corsu di validità.
14) Veìculi : Qualessa sia l'ora di prisentazione di u passageru, u traspurtadore è/o u cummandante è/o l'agenti incaricati di l'imbarcu anu a facultà d'urganizà à parè soiu l'òrdine d'imbarcu di i veìculi. In casu di scambiu d'orarii, di nave, o per càusa di forza magiore, chì u traspurtadore ùn possa imbarcà un veìculu puru riservatu è prisentàtusi in règula, stu veìculu si tene priurità d'imbarcu nant'à u viaghju pròssimu senza chì u passageru possa chere qualsìasi spesa di cumpensu. Sè à l'arrivu à u portu di destinazione, e cundizioni di mare o altre càuse indipendenti da a vuluntà di u traspurtadore ùn permettèssinu u scalu di i veìculi, serèbbenu sbarcati questi u più prestu pussìbule, nant'à portu di destinazione o quellu di pròssimu scalu, senza chì u passageru possa pretende à qualsìasi spesa di cumpensu. In casu di falza dichjarazione di misure di u veìculu, u traspurtadore si tene u dirittu di ricusalli l'accessu à bordu è/o d'incascià a diferenza per i veìculi fora di misura. L'uperazioni d'imbarcu è di scalu dèvenu esse fatte da u passageru, chì cunducerà ellu u so propriu veìculu. I veìculi dèvenu esse purtati sin'à l'usciu di u garagiu (à l'entrata di a nave in casu d'imbarcu, à a surtita in casu di scalu) sottu a sana è sola rispunsabilità di u cunduttore chì duverà rispettà tutte e règule di sicurezza chì gestìscenu a circulazione nant'à i moli purtuali. Hè difesa di staziunà à menu di 50 m da a nave durante l'uperazioni d'imbarcu è di scalu. À l'internu di a nave duverà u cunduttore ingarà u so veìculu secondu l'istruzzioni date da u persunale di bordu. I veìculi imbarcati duveranu esse lasciati chjosi à chjave, frenu à manu stinzatu è vitezza incruchjata.
15) Bagaglii : Ogni passageru hà u dirittu à u trasportu di gràtisi di i so bagagli à manu. Dèvenu cuntene quessi solu effetti persunali. E misure lìmite accettate sò di 200 cm d'altu, 100 cm di largu è 50 cm di fondu. Bagaglii fora di misura cum'è canoë, kayak, etc ... s'elli ùn sò messi sopr'à u veìculu dèvenu esse posti in garagiu è seranu sottumessi à spese da pagà in partenza à l'uffiziu d'imbarcu o ancu à bordu. U passageru pò purtà i so bagaglii in cabina o à un postu per ellu signalatu, sottu à a so rispunsabilità.
U traspurtadore ricusa ogni rispunsabilità in casu di bagaglii arrubbati, smarriti o rotti. U traspurtadore ricusa dinò ogni rispunsabilità per i bagaglii di manu quand'elli sò tenuti da u viaghjadore in propria manu, puru s'elli vènenu allucati dentru i posti à dispusizione, fintantu chì a colpa di u traspurtadore ùn s'hè pussuta verificà. Ma puru tandu, e spese di cumpensu ùn puderanu assupranà 300 €.
16) Malatìe - Donne incinte :
Salute di i passageri :
Ogni casu particulare di salute deve esse dichjaratu à tempu à a riservazione. U traspurtadore pò ricusà l'imbarcu à i passageri chì averèbbenu bisognu d'una assistenza particulare durante u viaghju, postu chì solu in casu d'urgenza hè abilitatu u duttore di bordu à purtà assistenza. S'ellu presenta u passageru un certificatu medicale fattu in cundizione, è chì stabilisce ch'ellu ùn hà nisun'bisognu d'assistenza medicale particulare durante u viaghju, u traspurtadore tandu u ferà imbarcà, ma ricusendu ogni rispunsabilità riguard'à ellu. In soprapiù, u cummandante hà tuttu pudere di ricusà l'imbarcu ogni persona di cundizioni fìsiche o mentale ch'ùn li permetterèbbenu micca di viaghjà, o à ogni persona di cumpurtamentu periculosu pè l'altri passageri, per via di troppu cunsumazione di droga, bienda alcòlica o robba allucinatoghja. In tutti quelli casi mintuvati più sopra, u passageru ùn si puderà francà di a so rispunsabilità pè i danni à ellu stessu cagiunati, à a nave, à ogni so attrezzu o ghjente d'equipagiu, à ogni persona terza quant'è à a so robba. U fattu chì u passageru sia accettatu à bordu da u traspurtadore ùn duverà esse cunsideratu dopu cum'è rinunciu à qualsìasi dirittu à sprime riserve sopr'à u statu di u passageru, cunnisciutu da u traspurtadore o micca, à u mumentu di l'imbarcu è/o di a partenza di a nave.
Donne incinte :
E donne incinte avendu francatu u seièsimu mese di gravidenza dev'èssenu ubligatoriamente pruviste d'un certificatu medicale chì l'auturizeghja u viaghju, da prisentà à ogni dumanda di u persunale di bordu. In casu di gravidenza cun cumplicature di salute, a passagera incinta duverà esse ubligatoriamente pruvista d'un certificatu medicale chì l'auturizeghja u viaghju, quale ellu sia u mese di gravidenza. In soprapiù, u cummandante hà tuttu pudere di ricusalli l'imbarcu. U fattu chì a passagera sia accettata à bordu da u traspurtadore ùn duverà esse cunsideratu dopu cum'è rinunciu à qualsìasi dirittu à sprime riserve sopr'à u statu di a passagera, cunnisciutu da u traspurtadore o micca, à u mumentu di l'imbarcu è/o di a partenza di a nave. A passagera ùn si puderà francà di a so rispunsabilità per i danni à ella stessa cagiunati, à a nave, à ogni so attrezzu o ghjente d'equipagiu, à ogni persona terza quant'è à a so robba.
17) Passageri cun poca mubilità : Tempu a riservazione, i passageri duveranu mintuvà a so poca mubilità. In u scopu di facilità l'accessu à bordu, i passageri cù poca mubilità duveranu fassi cunnosce da u capiscalu, bellu prima u principiu di e manofre d'imbarcu, vale à dì omancu un'ora prima di a partenza.
18) Animali : Sò accettati l'animali à bordu ma dèvenu esse tenuti da u patrone longu a traversata sana. Hè ubligatoriu di tene i cani ligati è cù a so musarola, è d'avè una gabbia da viaghji pè i gatti è altri animalucci. À bordu, l'animali ponu accumpagnà u passageru in tutte e sale pùbliche, fora di l'usterìe. U persunale di bordu puderà quantunque limitalli l'accessu à certi lochi. Pò esse richiestu un certificatu di vaccinazione è di bona salute di menu di 3 mesi di validità.
Perìculu murtale : Hè difesa à i passageri di lascià l'animali in vittura durante a traversata.
Sò accettati l'animali vivi senza alcuna guaranzìa di pèrdita, malatìa o morte è perciò a Cumpagnìa ricusa ogni rispunsabilità per i danni di qualsìasi natura, chì puderèbbenu esse cagiunati durante u viaghju.

Rispunsabilità è òbligu particulare di u passageru

19) Rispunsabilità : Hè rispunsèvule u passageru d'ogni dannu cagiunatu da ellu o da ogni persona o animale sottu à a so custòdia, à a nave, à l'accumudazioni o attrezzi, ad altri passageri, à u persunale dipendente da u traspurtadore, à terzi, è dinù d'ogni sanzione, cuntravenzione, amenda o altra spesa chì, cagiunatu da fatti soi, serebbe attribuita à u traspurtadore da a parte di qualsìasi autorità di qualsìasi paese.
20) Minori : Ùn ponu viaghjà soli i zitelli minori di menu di 16 anni. Dèvenu esse sempre curati da i genitori o adulti chì ne anu a custòdia è ùn ponu viaghjà per a nave senza esse accumpagnati. U traspurtadore ùn puderà esse tenutu cum'è rispunsèvule per i danni cagiunati à minori, in casu di viulazione di ciò ch'hè statu spostu quì sopra.
21) Arme : Hè difesa à u passageru di purtà à bordu arme bianche è à focu, munizioni, splusivi, benzina o altri prudutti periculosi o da piccià focu, senza l'accunsentu scrittu di u traspurtadore è l'autorizazioni legale à prisentà da u passageru. Hè ubligatoriu tandu ch'ella sia quella robba cunsegnata ind'è u cummissariu di bordu è resa à u passageru solu à u mumentu di u scalu.
22) Bagagliu d'illegale pussessu : U passageru in pussessu di bagaglii cuntenendu- o puru chì ferebbe entre à bordu- robba o sustanza illegale o di contrabandu serà rispunsèvule di pettu à u traspurtadore è/o altri ubligati per danni, cuntravenzioni o amende chì à elli serèbbenu attribuite per via di tale pussessu.
23) Veìculi cù alimentazione à gasu lìquidu (GPL) : Per ragioni di sicurezza, ùn ponu esse imbarcati nantu e nave Corsica Express i veìculi cù alimentazione à gasu lìquidu. Per l'altre nave deve mintuvà u passageru, à tempu a riservazione o l'acquistu di u bigliettu, chì u so veìculu hè alimentatu cù gasu lìquidu. In mancanza di tale dichjarazione, u passageru si perde u dirittu à l'imbarcu di u veìculu è deve pagà una penalità uguale à u prezzu di u trasportu persu da u traspurtadore.

Rispunsabilità è diritti di u traspurtadore

24) Mudìfica o annullamentu di partenza : Scambiu di viaghju. In casu d'una partenza attempata da più di 24 ore, puderà quantunque chere u passageru l'annullamentu di u so trasportu è u rimborsu di u prezzu pagatu. Di listessu modu, in casu d'annullamentu di a partenza da u traspurtadore, averà solu u dirittu u passageru à u rimborsu di u prezzu pagatu. U traspurtadore si tene dinù a facultà di fà, secondu a vuluntà di u cummandante è per ragioni liate à a navigazione, altri scali da quelli previsti. U traspurtadore ricusa ogni rispunsabilità in casu di pèrdite o danni dopu tempurale, affundamentu, inticciu, cambiu di rotta, manofre d'accostu o d'ammollu, quarantana, incendii, atti di guerra o di piratterìa è di qualsìasi accidente o perìculu di mare, suspesa o annullamentu d'accostu o di ligna, cambiu d'itinerarii è orarii o di qualsìasi evenimentu liatu à a navigazione per càusa di forza magiore o di greva di persunale marìttimu o di terra.
24 bis) Mudìfica o annullamentu di partenza per e nave veloce : Per ragioni tècniche liate à u cunfortu è à a sicurità di a navigazione, hè stabilitu chì e nostre nave veloce ùn dèvenu fà traversate in casu di gattive cundizioni meteorològiche, anzituttu cù marusulate di più di 3 m d'altu. Custattatu ch'ellu appia u traspurtadore cusì gattivu tempu, secondu a so pròpria è incuntestèvule decisione, serà annullata a partenza di e nave veloce è si tenerà u passageru u dirittu di fà una pròssima traversata cù una altra nave tradiziunale di u traspurtadore. Tandu averà solu u passageru u dirittu à u rimborsu di a diferenza di prezzu, senza alcuna spesa di cumpensu di qualsìasi natura.

Ùn ponu esse tenuti da rispunsèvuli nè u cummandante nè a Cumpagnìa in casu di cambiu di rotta, mudìfica, arrestu di servìziu o ritardi di partenza o d'arrivu di i battelli, nè di a pèrdita di sincrunìa di battelli, aviò o treni, nè di casi di quarantana, essendu e spese d'allogiu è di cibu à càricu di i passageri in tutti quelli casi mintuvati quì sopra. U cummandante è a Cumpagnìa ricùsanu dinò ogni rispunsabilità in casu di ritardu mentre u cumpiimentu di u cuntrattu di trasportu, o di a mancanza di cumpiimentu di u cuntrattu, è d'ogni cunseguenza d'avarìa, di gattive cundizioni meteorològiche, di disimpiegu, guerra civile o straniera, di greva parziale o sana, di cuncolta frà patroni o impiegati, qual'elli sìanu è di qualsìasi gradu o funzione, à u servìziu di a Cumpagnìa o micca, è di qualsìasi disarmamentu o arrestu parziale o sanu di i battelli di a Cumpagnìa dopu à situazione di bloccu parziale o sanu, quale ne sia l'autore. U cummandante è a Cumpagnìa ùn ponu esse tenuti da rispunsèvuli di e cunseguenze di tutte'sse mancanze, arresti o tuglitura di servìziu. Spese cun rìsichi di sugiornu seranu à càricu di i passageri.

25) Durate di traversata : E durate di traversata mituvate nentr'à i ducumenti cummerciali è nant'à u situ internet di a Cumpagnìa ùn tènenu à contu i tempi di scalu.
Tocca à i passageri à tènene contu in l'almanacchera di u so sugiornu.
26) Assestu in cabina : In casu di sbagliu mentre l'attribuzione di l'accumudazione à bordu, u passageru ùn puderà pretende à nisun'cumpensu, è li tuccherà à accettà l'accumudazione à ellu attribuita da u traspurtadore à megliu fà.
A riservazione d'una cabina ùn intende mancu appena l'attribuzione ubligatoria d'una cabina cun finestrinu.
27) Rispunsabilità per u trasportu di veìculi : U traspurtadore ùn hè micca rispunsèvule per e pèrdite o danni cagiunati à i veìculi nè durante l'uperazioni d'imbarcu è di scalu, nè durante a traversata. U traspurtadore ùn hè micca rispunsèvule per e pèrdite o danni cagiunati à a robba in veìculu. Puderà esse cunsegnata ind'è u cummissariu di bordu, contru ricevutu, qualchì robba di valore cum'è apparechji fottò, cannuchjali, etc ...
28) Robba di valore : U traspurtadore ùn hè micca rispunsèvule per e pèrdite, arrubbecci o danni cagiunati à robba di valore, soldi, scartafàcciuli, tenùtisi in bagaglii è/o in veìculu, fora ch'ella fussi stata quella robba cunsegnata à un persunale incaricatu di a so cura.
29) Dirittu di pegnu è di ritensione : U traspurtadore hà u dirittu di pegnu è ritensione sopr'à bagaglii è altre pruprietà di u passageru, veìculu cumpresu, in guaranzìa di qualsìasi pagamentu chì à u passageru tuccherebbe di fà a u traspurtadore per qualsìasi tìtulu o fattu liatu à u trasportu. Perciò, s'ellu ùn paga u passageru ciò ch'ellu deve, u traspurtadore hà a facultà di fà vende a robba indetta quì sopra, puru senza autorizazione di ghjustìzia, è à racògliesi u devutu sanu, spese ausiliare cumprese, sopr'à a somma incasciata.
30) Riclamu : L'eventuale riclami di qualsìasi natura duveranu esse fatte sùbitu à u cummissariu di bordu. I riclami per danni à i veìculi duveranu esse fatti sùbitu à l'ufficiali incaricati di l'imbarcu chì scriveranu un raportu di danni à prò di u passageru. Tuccherà à u passageru di zifrà stu raportu chì però ùn puderà custituisce alcun'accettazione di rispunsabilità è/o ricunniscenza di qualsìasi sorte da a parte di u traspurtadore. I riclami spruvisti di a copia di quellu raportu di dannu ùn seranu nè esaminati nè accunsentuti da u traspurtadore. Fora chè altru tempu lìmitu di prescrizzione più favurèvule à u traspurtadore, qualessa sia l'azzione contr'à u traspurtadore, cuntrattuale o estracuntrattuale, per morte o dannu persunale, pèrdita o dannu di bagagliu, veìculu o per cumpensu di danni à qualsìasi tìtulu, serà cunsiderata quella azzione cum'è inaccettèvule s'ellu ùn hè statu nutificatu qualchì attu di citazione da u ghjùdice cumpetente in l'annata dopu u scalu di u passageru. Ùn puderà esse rispunsèvule u traspurtadore per atti o fatti stalvati fora di a nave.

Riclami à a Cumpagnìa : Per ogni riclamu altru o richiesta di cumpensu, u passageru si pò addirizzà à u Serviziu-Cliente di a Cumpagnìa :
Corsica Ferries France SAS
Service Clientèle
Le Palais de la Mer
Avenue Pascal Lota BP 275
20296 Bastia Cedex
E-mail: client@corsicaferries.com
Tél: 04.95.32.95.95
Dopu avè toccu u Servìziu-Cliente è in mancanza di risposta accettatoghja à u capu di 45 ghjorni, u cliente pò cuntattà u mediatore di u Turìsimu è di u Viaghju, chì indirizzu soiu è modu di cuntattu si pò cunsultà nant'à u so situ : www.mtv.travel .