U Galateu di l'Ecoturìsimu

Avete sceltu a Corsica per passacci una stonda di vacanze. Forse n'avete sunniatu, forse a tenite caru ...
Ma pigliate à contu chì, fendu spassighjata, velighjata, marchja o campeghju, lascerete una vistica di a vostra venuta, cum'è i 2 millioni di statinanti chì anu da vene quist'annu in Corsica ...
Ancu voi forse, per sgalabatezza o ignurenza avete da cuntribuisce à u scempiu di u patrimoniu naturale o culturale è ferete disguasti ch'ùn si ponu riparà ... Cunservà sti patrimonii intende un sforzu cullettivu veru, ma sopratuttu una presa di cuscenza individuale.
L'embiu naturale hè a ricchezza maiò di a Corsica : fighjate, girandulate, ma rispettate è curate.
Iè, àppiate a primura d'esse un ecoturistu rispunsèvule. Serà tandu u vostru viaghju di quellu ch'ùn si scòrdanu mai !


L'embiu naturale : fighjate, girandulate, ma rispettate è curate


Locu di vacanze ghjè terra d'accuglienza duve no simu òspiti.
Viaghjà, ghjè piglià u tempu di scambià cun quelli chì ci accòglienu in e so loche.
Ghjè dinò cuntribuisce à u sviluppu ecunòmicu di u paese, scegliendu di cunsumà i prudutti di u rughjone : carne purcina, casgiu, brocciu o a bunìssima birra Pietra, fatta cù a farina castagnina.

In mare, nantu marina, in fiume

  • Pescu solu in e loche duv'ella hè auturizata a pesca.

  • Sottu mare, mi primureghju d'ùn marchjà micca nant'à u curallu, d'ùn ròmpelu micca cù e mo palme.

  • Nantu marina, adopru crema contr'à u sole solu biofracichèvule, anzi chè oliu cun filmu plàsticu ch'hè gattivu per a fottosìntesi di l'alghe.

  • Ùn facciu micca falà u mo battellu nant'à l'erbaghji di « paglia marina » (pusidunìa), alga di prima necessità per a ripruduzzione di i pesci.

  • U mare ùn hè rumenzulaghju ! Sacchetti di plàsticu in l'acqua, mai ch'ella sia : I delfini è e cuppulate i pìglianu per potte marine è si stufulèghjanu vulèndusi le ingolle.

  • U fondu di benzina di u mo battellu, i cabinetti à bordu, i sviotu solu in e vasche previste apposta nant'à i porti.

  • S'o aghju da lavammi in fiume, adopru solu prudutti biofracichèvuli.

  • Siti cunsigliati :
  • www.parc-naturel-corse.com
  • www.oec.fr
  • www.crdp-corse.fr
  • www.corse.ecologie.gouv.fr
  • www.stantari.net

In muntagna, per una spassighjata o una marchja

  • Mi stò per i chjassi assignalati, per ùn scempià micca e piante è ùn favurisce micca u sfussà di i terreni pendivi.

  • Cunsulteghju a meteò capunanzu, è partu à matina à bon'ora cù a friscura per limità i rìsichi d'assuppera di l'urganìsimu.

  • Arburi è scoglii ùn sò quì apposta per a nostra spressione artìstica : inzecche è scrivacciulate sò brutte faccende !

  • Siti cunsigliati :
  • www.conservatoire-du-littoral.fr
  • asso.acmo.free.fr
  • www.onf.fr/corse

In viaghju cum'è in casa, risparmiu acqua è energia

  • Mi pigliu una duscia (50 litri) anzi chè un bagnu (150 litri).

  • Annacqueghju u mo giardinu di seratina quand'ellu hè menu forte u svapurime : Vale un risparmiu d'acqua di 50% !

  • Mi ghjovu di a riserva doppia di u cabinettu.

  • In albergu, dumandu ch'elli ùn sìanu scambiati ogni ghjornu i mo asciuvamani è lenzoli. A bucata hè assai ingorda in acqua è eletricità, è sparghje pulluzione maiò in l'acqua.

  • Provu à ùn accende micca climatisazione, luttendu cusì anch'eo contr'à u riscaldu climàticu. Bàstanu un fazzulettu, un vestitu o un lenzolu crosciu per rinfriscassi appenuccia, in tempu di sicchia.

  • Adopru caricadori di pile chì viàghjanu cù l'energia di u sole.

Attenti à u focu !

  • Prima di parte à marchjà, mi rinsegnu nant'à i rìsichi d'incendiu.

  • Mai ch'ella sia di lampà un mòcculu in pianu, in piena natura !

  • Attenti à u vetru ! Buttiglie è chjàppuli di vetru abbandunati in terra ponu fà da luppa è fà piccià focu.

  • Di statina sò difese e fuchere di campeghju, è dinò i barbecues !

U mullizzu basta !

  • In piena natura o nantu marina, ùn lampate nè carta, nè canette, nè buttiglie, nè sacchi di plàsticu !

  • Ricuarate u vostru mullizzu fin'à in cità duve chì u lamperete in una rumènzula.

  • Per i vostri apparechji fottò o videò, aduprate pile chì si carichèghjanu.

  • Sceglite piuttostu materiale chì si pò turnà à usà anzi chè si ghjetta.

È per andà più indà ...